حكاية

موضوع: حكاية الأحد ديسمبر 02, 2007 4:03 pm

فؤاد حداد

حكاية

اللي باقوله حصل ولا ما حصلش، والاكان بيحصل بحس واطي ماحدش سامعه، ماليه السما حدّاية مالية السما اللي بتاعة العيون والسما اللي بتاعة الودان حدّاية، اتصور حدّاية مفلطحة مناخيرها بتغني، وكان الشجر تركواز وكل زير في الظلة شيخ النجارين ركّب عليه أربعة أكواز، في العصر وميدان الجيزة اللي حادف على ميدان أم المصريين كرمش من تقل صوت الحدّاية من كتر صوت الحدّاية، وصوت الحمامة ولا إيه العصفور ماكانش باين خالص، ولا حد قادر يفلفص ولا ظلة تتملص من التبعه، وصوت الحدّاية يسرسع واثق بطئ معتد، زي الفلوس بالقطارة والسم بالرسوب، السم بالمنشار
فــــــلاح بلاح زرع نخلة فــــــلاح بلاح
يا عماد الدين جاد المولى فـــــلاح بلاح
بين الوحشين أنا الأحلى فـــــــلاح بلاح
بين الواطيين أنا الأعلى فـــــــلاح بلاح
دنيا الجايين ماهيش سائلة فـــلاح بلاح
بين التانيين أنا الأولى فـــــــــلاح بلاح

كان حلم وفجأة عيون الحدّاية اتفرتكت في الهوا، وهي اتفقعت زي عينيها من الغيظ، والعصفور اتنشق زي اللي فاق من الحلم طبعا لازم أحلف ستميت حلفان تصدقوا ولا ما تصدقوش إنه حلم ولا حقيقة
مش كله واحــــــد
ولا كله زي بعضه
بس أنـــــــــا اللـــي عجّزت وفرحــــت لــــمــــا افتكـــرت
اني حارجع زي زمان طفل صغير أتوه وأسأل عن مطرح
البيت الفيروزي البحري علمته بعصفورة ونخــــلة وحبل
وجلاليب زرق جـــــلاليب زرق
ماشيــــة بطول البحــــــر تزق